Ақмола облысында Qazaq Kaolin ГОК-ы техникалық іске қосылып, сынамалық өнім шығара бастады.
Ақмола облысының Зеренді ауданында Qazaq Kaolin тау-кен байыту комбинатының жабдықтарына техникалық іске қосу жүргізілді. Кәсіпорын Алексеев кен орнында жұмысын бастады. Компанияның тең иелері – Қыдырғали Байбек пен Бекзат Керімбай.
Техникалық іске қосу сәуір айының соңында өтті. Өндірістік алаңда негізгі технологиялық жабдықтардың жұмысы тексеріліп, өнімнің сынамалық партиясы шығарылды. Компания басшысы Марат Хасеновтың айтуынша, жоба байытылған каолин өндіруге бағытталған. Қазіргі таңда кәсіпорында германиялық AKW компаниясының мамандары іске қосу-жөндеу және технологиялық сынақ жұмыстарын жүргізуде.
Кәсіпорын жылына 230 мың тонна шикізат өңдеп, 90 мың тоннаға дейін байытылған каолин өндіре алады. Сонымен қатар төрт түрлі фракциядағы кварц құмын шығару жоспарланған. Жобаға Германия, Қытай және Ресейден жабдықтар әкелінген. Металл конструкцияларын Теміртау зауыты жасап, құрылыс жұмыстарын қарағандылық AsiArt компаниясы орындаған.
Жобаның жалпы инвестиция көлемі – 12 миллиард теңге. Тау-кен байыту комбинатының құрылысы 2025 жылдың тамыз айында басталған. Қазір негізгі өндірістік нысандар салынған, жабдықтар іске қосылған. Кәсіпорын сынақ режимінде жұмыс істеп тұр.
Қазір мұнда 53 адам еңбек етеді. Толық қуатқа шыққанда қызметкерлер саны 90 адамға дейін артады. Толық іске қосу 2026 жылдың шілде айына жоспарланған. Алғашқы өнім шетелдік клиенттерге сынақ үшін жіберілген.
eGov дерегіне сәйкес, Qazaq Kaolin компаниясының иелері Қыдырғали Байбек пен Бекзат Керімбай. Айта кетейік, Қыдырғали Байбек Алматының бұрынғы әкімі Бауыржан Байбектің әкесі. Ол 2015-2019 жылдары қала басшысы болған. Бұған дейін Байбек әкесі Қазақстанның тұңғыш президенті Нұрсұлтан Назарбаевпен сыныптас болғанын айтқан.
Қыдырғали Байбектің есімі бұған дейін Елдос Қоспаевқа қатысты қылмыстық іс материалдарында да аталған. 2019-2020 жылдары оған қатысты құрылымдар Алматыдағы бірнеше нысанды «AV-Construction» арқылы төмен бағамен сатқан деген ақпарат болған. Ал Бекзат Керімбай елордадағы Aray Media Group корпоративтік қорының жетекшісі. Бұл ұйымның жалғыз иесі Айгүл Байбек, яғни Бауыржан Байбектің әпкесі.
Ақмола облысы әкімдігінің мәліметінше, компания энергетикалық инфрақұрылымды жаңғыртуға 650 млн теңге инвестиция салған. Соның нәтижесінде трансформаторлық қосалқы станция қуаты үш есе артқан және жақын маңдағы елді мекендер тұрақты электрмен қамтылған.
Техникалық іске қосу рәсіміне Зеренді ауданының әкімі Әсет Құрманғожин, облыстық басқарма өкілдері және жергілікті тұрғындар қатысты.
Еске салайық, бұған дейін сотта Biz Birgemiz қорына Бауыржан Байбектің қатысы бар екені айтылған. Алайда Қаржы мониторингі агенттігі оның және отбасының үстінен тергеу жүргізілмейтінін мәлімдеген. Ал қарындасы Айгүл Байбектің айтуынша, ағасы мемлекеттік қызметтен кеткеннен кейін екі жылдан астам уақыт БАӘ-де оқып, жұмыс істеп, Қазақстанға шетелдік инвестиция тартумен айналысқан.